前嗰排解放南嘅大都市鞋城拆咗，呢个喺闹市经营咗20年嘅批发市场正式收工。
有啲后生仔会问，点解市中心里边会有咁嘅批发市场呢？呢度就要讲下鞋城附近嘅濠畔街喇。呢条濠畔街喺大德路南边，连住解放南路，系一条有好耐历史嘅古街道。之所以称为“濠畔”，系因为明朝时佢喺护城濠嘅南边。清朝嘅时候，因为有好多山西票号过来开商号，濠畔街成为广州嘅金融中心，有各地嘅会馆，会馆前边仲搭埋戏台。到咗清朝末期，濠畔街分成三段，西段系钱庄、药材、绸缎商号，中段系乐器行，东段就系做皮革嘅商号喇。
当时濠畔街嘅皮革生意做得好大，据讲有一间叫做永利源嘅商行，佢嘅皮革生意甚至可以同沙面英商、美商竞争。久之，呢度成为皮革集散地。改革开放之后，珠三角好多皮鞋厂、皮具厂都过来濠畔街攞皮料鞋材。呢啲厂家又将附近嘅解放南变成皮鞋成品中转地，其他皮具则分发到三元里。
其实广州好多批发市场做大之前都同街巷行市有关，譬如灯具市场、布匹市场、服装市场、海味市场等等。呢啲市场，虽然有时会影响周边交通，不过算得上系广州商业发展嘅缩影，得闲逛下几有意思嘎。
◎李月婷 媒体人